Өөн дуглаар
Өрегелиг болзун!
Өөн дуглаар
Хаяапчалыг болзун!
Чүшкүрерге, оттуг,
Оттуларга, ыяштыг,
(Кижиниц эки эдин эдилезин),
Ээнзирел билбес
Ээлиг өглүг болзун!
Чаъс чаарга, чаглактыг,
Чайык кээрге, бугалыг,
Хат кээрге, ыжыктыг,
Халап кээрге, камгалалдыг,
Каш кезек ханаларлыг
Кайгамчыктыг ак
Өглүг болзун!
Хая дег бараанныг болзун!
Хараган дег малдыг болзун!
Аъш-чеми аяк-савазыразын,
Ажы-төлү ара-амытан болзун!
Азыраан малы
Аалга сыңмас болзун!
Эштеринге белектерлиг,
Эженинге албанныг,
Окпан-чикпен оолдуг,
Оранчаан чурттуг болзун!
Алдайындан
Алдызын салбас,
Өвүрүнден
Өргезин салбас,
Өөр-өнер өөрлүг,
Өде-чара оолдуг болзун!
Чарышка салыр аъды
Чарлыг, сураглыг болзун!
Мөге хүрешкен черге
Мөге салыр оолдуг болзун!
Оюн-каткылыг
Оюн баштаар кыстыг болзун!
Маңнайлыг, өөрүшкүлүг,
Мал малдаар кыстыг болзун!
Ойбак-дыдыын илип чоруур
Оңгуваа-чечен кыстыг болзун!
Дөрт шагда могаг билбес,
Дөрт чүзүн малы өзүп чорзун!
Баглаажындан
Мал куруглавас болзун!
Чериниң кат-чимизи —
Үзүм-чигир болзун!
Черниң ай-бези
Үе сонуургаар болзун!
Чеми болзун!
Азыраан малын карактап,
Алдай таңдызын аңнап,
Оран-делегейге чалбарып,
Омак-хөглүг чурттап чорзун!
Азыраан малдың,
Ажы-төлдүң куду-сузу бедик турзун!
Кураай-кураай!
Алган дөзү:
Тувинские народные песни и обрядовая поэзия. / Сост. д. иск. З.К. Кыргыс. – Кызыл: «Сибирская горница». – С. 50 - 52.