1. Хая дег эттиг,
Хараган дег малдыг бол, уруум!
Торлаа дег ажы-төлдүг,
Торгу дег каас бол, уруум.
Аъттанган аъдың
Чыраа болзун!
Азынган эдиң
Алдын болзун, уруум!
Эзертээниң
Чыраа болзун!
Эдилээниң
Мөңгүн болзун, уруум!
Хараганныг хову
Кежир кылаштава,
Кокай кончуг эвес бе, уруум.
Ажынгаштың,
Арт ажыр кылаштава, уруум,
Адыг кончуг эвес бе, уруум.
Урууңну ыглатпайн өстүр,
Улугну хүндүлеп чор, уруум.
Ине сыптаар
Кыстыг бол, уруум.
Бак сөстү
Бажың ажыр,
Эки сөстү
Эктиң ажыр салып чор, уруум.
Үнген-киргениңни
Хүндүлеп чор,
Ушкан-турганын
Тургузуп чор.
Кирген кижи
Куруг үндүрбе,
Чанган кижини
Үдеп чор, уруум.
Аалыңга кээр
Аалчылыг бол!
Аалдап чоруур
Кыстыг бол, уруум!
2. Алыңгы эдээн
Ажы-төлү чаза базар болзун!
Соңгу эдээн
Анай-хураган чаза базар болзун!
Челип четпес
Челелиг болзун!
Шаап четпес
Коданныг болзун!
Баштаңгызы маңнык-торгу болзун!
Бастырганы чыраа-саяк болзун!
Эзертээни челер-маңнаар болзун!
Эдилээни алдын-мөңгүн болзун!
Торга ышкаш каас болзун!
Торлаа ышкаш өнер болзун!
Намзырай дег бай болзун!
Найдың-куу дег өнер болзун!
Улагга мунар аъттыг болзун!
Урук сөөртүр оолдуг болзун!
Орайындан
Очур-Маанай бодаразын!
Бажындан
Мага-Кала бодаразын!
Назыны узун болзун!
Амыр-чыргалдыг болзун!
Алган дөзү:
Тувинские народные песни и обрядовая поэзия. / Сост. д. иск. З.К. Кыргыс. – Кызыл: «Сибирская горница». – С. 54 - 56.