Эжик аксын углай салган

Эжик аксын углай салган

Эжен саңым салып алган,

Ак чалама азып алган,

Аъш-чемим делгеп алган,

Чажыымны чажып,

Чамбы-дипке чалбарып тур мен.

Чыл бажы келди,

Чылан бажы түледи.

Эртип турар эрги чыл —

Эртинелиг аът чылым

Эргий маңнап эртти.

Хая-дашты казырады,

Кадыг черни кадай базып

Хачы-кулак дээрде четкен,

Ыдык чели дискек четкен,

Хаш-хүлер дуюгларлыг,

Чарба чели чая дүшкен,

Суук кудуруу дорзук ашкан,

Чарба челдиг Чараш-Бора,

Хөвең челдиг Көк-Бора,

Көк дээрни хөлбеш кылдыр,

Карак чивеш аразында

Хаан-Көгей тайгазынче

Халдып, маңнап эрте берди.

Хоюг дүгү саглаңайнып,

Хову оъдун оъттап каап,

Чашпан бажын үзе шелип,

Чаяңнады саяктап каап,

Кончуг оожум чаңы-биле

Хой чыл, Хайыракан,

Коданында моорлап келди.

Алган дөзү:

Тувинские народные песни и обрядовая поэзия. / Сост. д. иск. З.К. Кыргыс. – Кызыл: «Сибирская горница». – С. 107.