Бедик артым,
Чавызап өршээ,
Узун орук,
Кыскалап өршээ!
Удаан бот
Уйгу-дыштыг болзун!
Ожук-пашче
Олча-омак кирип турар болзун!
Орук-суур
Омак-хөглүг болзун, Таңдым!
Алдын таңдымдан колданып,
Диленип келдим.
Аъттандым, толандым,
Аар боомну чүктеп алгаш,
Ая-дузаам дергилеп алгаш,
Кара хаяның баарында
Кара казандыымны
Паштанып алгаш,
Аастыг амытан амзаваан
Аъш-чемим дээжизин
ϴргүп тур мен.
Эринниг амытан эңгивээн,
Эм-таң болган
Шайым чажып тур мен.
Аңнап-меңнеп келдим,
Аң-мең аайлыг болзун!
«Көөр караан көжегелеп,
Дыңнаар кулаан дүүшкүннеп
Турзун» — деп
Алгап-йөрээп тур мен.
«Ток» дээнде, толагайын часпайн,
«Так» дээнде, таригизин часпайн,
Ал-бодум адынгыр болуйн,
Аткан огум чандыр барбазын!
«Сорар чаглыындан,
Чодур мыйыстыындан» — деп
Алгап-йөрээп тур мен,
Алдын Таңдым!
Бедик шораан тайгаларның
Мээс чарыын,
Улуг-улуг тайгаларның
Улуг-улуг дагларындан,
Мугулдурнуң мургузундан,
Даг черниң дачызындан
Харам чокка хайырлап көр!
«Чээренниң омаандан,
Кошкарның өлезинден,
Хемниң балыындан,
Дагның тарбаганындан» — деп йөрээп тур мен.
Доорадан келген кижилер
Топтап кайгап, бажын чайгазын.
Удур келген кижилерге
Ужа-төжүн салып бээр мен.
Алдын делегейим хайыразын,
Арат-чонум-биле четтирер мен,
Чооглаар мен,
Чамбы-дипке чалбарып,
Чажыым чажып,
Тейлеп тур мен, өршээ!
Алган дөзү:
Тувинские народные песни и обрядовая поэзия. / Сост. д. иск. З.К. Кыргыс. – Кызыл: «Сибирская горница». – С. 77 - 79.