Узун-Куйну дагаан черге
Улуг ужа эккээр-ле мен.
Тере-Хөлдү дагаан черге
Тараа-быдаам эккээр-ле мен.
Эдер-Куйну дагаан черге
Эът-ле сартыын эккээр-ле мен.
Даштыг-Хемни дагаан черге
Далган-тараам эккээр-ле мен.
Үнген хүннүң эгезинде,
Үнген айның чаазында,
Ширээ дашка саңым салып,
Шилик хевим бараалгаттым.
Кодан, чуртум менди бе деп
Кокпа, шыыры тайбың бе деп —
Дүңгүрлүгнүң дүвү мындыг,
Дүне тейлээр салым мындыг.
Орбалыгның ному мындыг,
Саңга тейлээр салым ындыг.
Улуг оран ному мындыг,
Дагга тейлээр салым ындыг.
Тевене дег кулугурнуң
Деңгивезин, сегивезин,
Тейлер бажы дагаан черге
Тендиңейнип тейлеп турар.
Ымыраа дег кулугурнуң
Ыятпазын, ырыкпазын,
Ыяш бажы дагаан черге
Ырбаңайнып тейлеп турар.
Ожук ышкаш кулугурнуң
Оокпазын, сергевезин,
Оваа бажы дагаан черге
Ойтаңайнып тейлеп турар.
Эртениң-не туруп тейлээр
Эртинелиг Кызыл-Тайгам.
Эдээм адаа элеп дүшкен
Ээрерген ээр Хемчиим.
Оваа, буга дагаан черге
Ой-ла-Хүрең маңнап-ла кээр.
Оолдар, кыстар ойнаан черге
Ортун оглу ойнап-ла кээр.
Шуурмакка оваа дагаан,
Суук-Хүрең эртип келди,
«Суму оглу Амырбиттиң
Бажы чарык келген» дидир.
Тейлер бажаа оваа дагаан,
Дезиг-Хүрең эртип келди.
«Девип үнген Амырбиттиң
Тейи чарык келген» дидир.
Кедээзинге хектер эткеш,
Ужуп чадаан Кызыл-Тайгам.
Кезек аалдар көжүп чадааш,
Дагып-ла каар Кызыл-Тайгам.
Дадай өршээ, Таңдым, өршээ,
Дадаазын дег тыным өршээ!
Эртен эрте туруп тейлээр
Эртинелиг тацдым, өршээ!
«ϴршээ» дээрге, өршээп турар
ϴл-ле ыяштыг Самагалдай.
ϴрү-куду өргүп турар,
ϴле бениң суду саңмал.
«Чайла» дээрге чайлап турар
Чаш-ла ыяштыг Самагалдай.
Самнап турар, номнап турар
Сарыг бөрттүг башкыларым.
Барлык баштап ажаалыңар,
Манчын-Богдаа тейлээлиңер.
Хемчик баштап ажаалыңар,
Кегээн-Богдаа тейлээлиңер.
Тайып-ла ушпас, давып турар
Даа-ла бээниң авыралы.
Даглар-ла бажы дагаан-на черге
Эртип-ле келир суруг куну.
Тендиш-ле дивес, девип-ле турар —
Дээрги-ле бээниң авыралы.
Тейлер бажы дагаан-на черге
Эртип-ле келир суруг куну.
Белдиринден аржаан аккан
Бедик ала тайгамны-ла аар.
Бежен кижи бараан болган
Бээжин ноян бээмни аар.
Ортузундан аржаан аккан
Ногаан ала тайгамны аар.
Он-на кижи бараан болган
Оожум чаагай бээмни аар.
Кызыл-Тайгам бажынайга,
Бис-даа кайын ажырар бис.
Кызыл чараш сүрүү турда,
Бис-даа кайын ажырар бис.
Сүвүр-ле тейниң бажы-ла каас,
Бис-даа кайын ажырар бис.
Сүвүр чараш сүрүү турда,
Бис-даа кайын чадаглаар бис.
Оваа-Хүрээ дагаан черге
Эртип-ле кээр сүрүг Доруу.
Очур-Маанай бурганынга,
Чүдүп тейлээн Оваа-Хүрээм.
Алган дөзү:
Тувинские народные песни и обрядовая поэзия. / Сост. д. иск. З.К. Кыргыс. – Кызыл: «Сибирская горница». – С. 98 – 101.