Элээрниң бажында,
Эзириктиң дылында.
Эткен сөзүнге ээ болур.
Узун эдек бутка ораажыр,
Узун дыл башка ораажыр.
Дамчыыр чугаа далай чалгыы.
Ийи ыт аразында сөөк кагба,
Ийи кижи аразынга сөс сөглевес.
Ыт аксынга кирген ханзыраар,
Кижи аксынга кирген човаар.
Хаг одундан халап үнер,
Каткы сөстен хоп үнер.
Кара паш хөөлүг,
Кара аас хайлыг.
Кокайга хой кадартпа,
Хопчуга сөс дыңнатпа.
Хоп хорандан хоралыг.
Сөглевиткенниң хөрээнде өжээзи,
Сөңнеткенниң хөрээнде өөрүшкү.
Сен утканда,
Мен сагынданда.
Бак сагыш башка халдаар.
Арнынга алгаар,
Артынга бактаар.
Мал алазы чараш,
Кижи алазы багай.
Даап сөглээр – тамылыг,
Танып сөглээр – буянныг.
Кургаг ыяш чулук чок,
Хоозун чугааа дуза чок.
Сөс сүрерге сөс үнер,
Сөөк кагарга чилиг үнер.
Хөөрем чорук көвүк ышкаш.
Чааскаан оргаш сагыжың шинчиле,
Хөйнүң аразынга сөзүң быжыгла.
Хөй сөсте олча чок,
Чаңгыс сөсте хор чок.
Дылың-биле дыт ужурба,
Аксың-биле аал көжүрбе.
Чугаа көвүдеди,
Хой ырады.
Кежиглиг хемни үер үрээр,
Кежээ келинни хоп үрээр.
Кижини бактаарга, черже кирбес.
Теректиң бүрүзү ажыг,
Тенектиң сөзү анчыг.
Сөөк хемдээш, хемиртизинге чедер,
Сөс соглээш, эчизинге чедер.