Кижи амытанны эгезинде бурган өлбес кылдыр чаяаган дээр. Кижини ынчаар мөңгежидер чүве болза Нара-Манчын деп бурганның аржааны болуп турган чүве-дир.
Нара-Манчын бурган ындыг аржаан кылгаш оозун аякка куткаш, аптыразының кырынга салып ап-тыр.
Нара-Манчын ынчаар-ла чурттап орда, бир-ле черде аарыг кижи сураа үнген. Нара-Манчын аңаа барып, ол аарыг кижини экиртип кааш, чедип кээп көөрге, аякта мөңге аржааны чок бооп-тур.
Нара-Манчын кайгап харап:
― Маңаа аржаан кайдал?— деп, авазындан айтырып-тыр.
Иези олургаш:
― Араа-Хөө димзенип турган чүве, ол ижипкеш барып-тыр аа — деп харыылаан.
Нара-Манчын Араа-Хөөнү сүргеш чорупкан. Үжен хонукта сүрүп келирге, Араа-Хөө ай иштинче кире халаан. Ай иштинче кирип чыдырда, Нара-Манчын Араа-Хөөнүң бел кежиин үзе шаапкан иргин.
Демги бели чок кижи Нара-Манчынга хорадааш, үжен хонгаш-ла айны дуглап турар мындыг чүве-дир.
