Теве биле күске маргышкан. Теве тура:
― Мен эң улуг амытан мен, мен чылга кирер мен — дээн.
Күске тура:
― Мен эң биче амытан мен, мен чылга кирер мен — дээн.
Теве тура:
― Ындыг болза хүн кайы чүктен үнүп келирил, ону мурнай көргенивис чылга кирзин — деп-тир.
Күске тура, ындыг-дыр деп чөпшээрешкен. Теве хүн үнер чүкче көргеш чыдып алган, күске тевениң мөгенинче үне халааш, соңгаар тайга бажынче көргеш олуруп алган. Ынчап турда, үнген хүннүң херели соңгу тайга бажынче дээп кээп-тир.
― Хүннү мен мурнай көрүп кагдым!—деп, Күске алгыра- ла берген.
Ынчангаш Теве ол орта аштырган. Күске чылга кирген чүве дээр.
Теве чылда кирбээн-даа болза, «он ийи чыл» Теведе дижир чүве: Тевениң думчуу тоолай думчуу дег, бажы пар бажы хевирлиг, тейинде дүктүг кудуруу чылан шинчилиг, караа аът шинчилиг, азыы хаван шинчилиг, дуюу инек шинчилиг, дүгү хой дүгү шинчилиг, мөгени сарбашкын шинчилиг, кулаа дагаа шинчилиг, үпчү-боду ыргак-аргак улу хевирлиг.
