Чазыйлаан адыгның ишти куртуур. Ооң куртун чүгле ажыг кымыскаяк, чыжыргана азы ааржы, божа өлүрер чүве-дир. Тайга-таңдының тооруу, кат-чимизи чылдың-на элбек болбас. Ынчангаш адыг чазыйлаан деп чугааны эпти-ле дыңнаарывыс ол-ла болгай.
Чоокта чаа Сүт-Хөлдүң Ишкинге хөктүг таварылга болган дээр. Өгге кадай кижи чааскаан олурган чүве-дир. Хүндүс эжикти чүве-ле дырбактай берген. Кадай эргин ойбаандан көре бээрге, аанакайын, адыг аксын аазадып, азыг-дижин шаарартып алган бо туруп турган. Кадай-даа угаан-кут чок, орун хозундува союп кирген.
Адыг эжикти ажыткаш, кирип кээп, дөрде чадып каан ааржыны чылгап эгелеп-тир. Ону төндүр чээш, чимзенип чоруй орун бажында хууңда араганы барып иже берип-тир. Күжүр иениң оглун өглээр дээш, чыып турган суксуну чүве иргин.
Он шаа литр хойтпак арагазын чооглапкаш, адыг ирей ширтек кырынга ужуп каап-тыр эвеспе.
Кадай үне халааш, кожазында фермадыва ыдып-ла каан. Аңаа барып, боо-моңгулуг улус чалап алгаш кээрге, ужуп калган адыг хаарыктавышаан хевээр чыткан.
Чазыйлааш, аалдап кээп, арагага ушкан адыг ирезин ферма улузу ынчаар даялап каан дээр.
Кыс-Халыыр
