Биеэде бүгү-ле амылыг амытаннарның чыыжы болган чүве-дир. Ол чыыштан Тарбаган озалдап каап-тыр. Тарбаган бир-ле көөрге, Кошкар эртип бар чораан.
Тарбаган тургаш:
― Ээй, Кошкар, кайыын келдиң, чүнү кылып чор сен?— деп-тир.
― Бүгү-ле аңнар болгаш куштарның улуг чыыжы болган. Ол чыышка чорааш, чанып бар чыдарым бо — деп, Кошкар харыылап-тыр.
― Ол чыышка чүнү чугаалажыр чүве-дир?— деп, Тарбаган айтырган. Кошкар тургаш:
― Бүгү-ле амылыг амытаннарның амыдырал-чуртталгазын болгаш арга арыг деп чүвени кандыг амытан алыр дугайын чугаалажыр боор чүве-дир — деп-тир.
― Арга-арыгны кандыг амытан алыр чүве-дир ынчаш?— деп, Тарбаган айтырган.
― Арга-арыгны адыр буттуг коңгумай38 деп амытан алыр боор чүве-дир — деп, Кошкар харыылап-тыр.
Тарбаган тургаш:
― Кандыг оранга кандыг амытан канчаар чурттаар дээр чүве-дир?— деп-тир.
Кошкар тургаш:
― Таңдының бажынга чурттап, дамырак суун ижип, оътту үш катап үзе тыртып чээш, кичээнгейлиг ыңай-бээр көрүп чор деп, мени чагыыр болду — дээн.
Тарбаган тургаш:
― Ынчаарга бүгү-ле арга-арыгны коңгумай алган болганда, сээң дазыл болган мыйызың шөлге ириири ол-дур, мээң дарбагар эрним коңгумайның эзериниң дергизинге кадары ол-дур ―дээш, уш катап сыйт-сыйт кылдыр эткеш, уңгурунче кире халаан.
Кошкар бодап көөрге, шынап-ла, Тарбаганның чугаазы шын болган. Ону дыңнааш, Кошкар дөрт карааның ийизин соолдур ыглап алган чүве-дир. Ынчангаш Кошкарның ийи карааның үстүнде ийи үттер артып калган чүве дээр.
Кыс-Халыыр
