Биеэде бир кезек кижи чаалажып чораан чүве-дир. Оларның бирээзи чодазын сый аттырыпкаш, өөрүнден азып чыдып калган. Балыгланган кижи багай чадыр өпейтип алы-ла, чактыр боозун чанынга салып алгаш, харанып олуруп-тур.
Демги кижи бир дүне көөрге-ле, бир кара чүве чадырже кирип кээп чыдып алган. Удаваанда база бир караа оттуг чүве халып олурган. Демги балыг кижи боозун баштай кирген кара чүвениң кырынга салгаш, халып кел чораан чүвенин ийи карак аразынче тутсупкан.
Эртенинде көөрге, баштай кирип келген чүвези — кижи- адыг, адыпкан чүвези — пар бооп-тур.
Ооң соонда кижи-адыг демги балыг кижээ эът эккеп берип, оът чиртип тургаш, балыын экиртип каан.
Кижи-адыг бир-ле чоруткаш эзерлиг аът эккелген. Демги кижи ону мунуп алгаш, хап чанып келген дээр чүве.
