Биеэде беш алтай аңчы адыг ижээнин хемелеп турганнар. Оларның-биле кады улуг чезең47 чораан чүве-дир.
Чезең тургаш:
― Ижээнни оя каскаш, иштин бакылап көрейн, менден коргар болгай аан бо?—деп кааш: ― Бир эвес сегирип алзымза, буттарым дырбаңайны бээр эвеспе. Ынчаарым орта, мээң буттарымдан туткаш, үндүр соп алыр силер?—деп-тир.
Чезеңи бакылап чоруй, буттары дырбаңайны берген. Өөрү демгизин ушта тыртып эккээрге, пу хайт, чезеңниң бажы чок бооп-тур.
Аңчылар бо канчап барган чоор деп аайын тыппайн, кадайындан барып айтырар-дыр деп сүмележип-тирлер. Демгилери аалга кээп айтырган.
Чезеңниң кадайы олургаш:
― Чезең удуй бергени ол бе?— деп-тир.
― Чезеңнин, бажы дүүн бар ийикпе?— деп, аңчылар айтырган.
Кадай олургаш:
― Та, аңнап-меңнеп чоруур дээш, арбай-тараа чип олурда, азыг-салы агбаңайнып орган-на чүве — деп-тир.
Ол орта бир назыдай берген ашак боданып олуруп-олуруп:
― Арга черниң аң-меңи-биле дөмей чурттап чоруур улус- тур бис. Мынчап барган кижи биске эш бооп, эдержип шыдавас ужурлуг боор чүве-дир. Ынчангаш мону өлген кижи деп санаар-дыр — деп чагып каап-тыр.
― Мындыг кижиниң сүлде-сүнезини өске оранга, бодунуң бо оранга эдилеп чораан эт-севи-биле кады чурттаар ужурлуг — дээш, орнукшудуп хөөп каап-тыр. Ынчангаш оон бээр-ле мөчээн кижини аът-хөлү, эзер-чонаа, оттук-бижээ, идик-хеви, ижер-чиири-биле кады хөөржүдер, оон бээр өлүм деп сөс бар апарган чүве дээр.
