Шаг дүп бүдүп турар эрте-бурунгу үеде чүве иргин. Бүгү- ле дириг амытаннарның амыдыралы болур арга-ыяш деп чүвени үлежири-биле улуг чыыш бооп-тур. Ол орта кижи тургаш, арга-ыяшты апкаш, бурт-ла дээн чүве иргин. Ынчаарда кижи амытан дүктүг, дөрт-даяктап маңнаар, кедергей-даа чүгүрүк турган.
Сыын ол чыышка чорааш, кел чоруй мезилге таваржы берип-тир.
Мезил тургаш:
― Арга-ыяш үлежир чүве дээрге, ынаар бар чыдыр мен, чүнү билдиң?—деп-тир.
Сыын тургаш:
― Арганы кижи алгаш арлы берди, хөй амытан кайгап туруп калдывыс — деп бажын чайгылааш:— Мээң дазылданган агжагар чаагай мыйызым тайга кырынга дүжүп чоруур, оран-чуртум база ол болур-дур. Сээң малбыйган бажың малгаш адаанга чыдар болду, суг дүвүнден ам үнмес-тир сен, ону дыңнадым ийин — дээш, ак баштыг тайгазынче халып үне берип-тир.
Мезил ону дыңнааш, кезек боданып туруп-туруп, даңзазын ызырып алгаш, бир хырын саржаан хойлап алгаш, суг иштиниң озанынче кулбуруп кире берген. Ынчангаш кижи делегейде бүгү-ле дириг амытаннарның эң-не күштүү, эң-не угаанныы болган чүве-дир. Ол-ла хевээр кижиден чүү-даа амытан кор- гар, сестир, дезер болган-дыр оо.
