Шаанда бир-ле падарчы лама чоруп-тур. Падарчылап чоруурга, черле чүве тывылбас бооп-тур. Бир-ле черге олуруп алгаш, хөйлеңин быттап олура, бир улуг-ла быт тудуп ап-тыр. Оозун шыгжап алгаш, бир-ле улуг бай аалга чеде бээрге, өгнүң эр ээзи чок, кадайы уруглары-биле олурган. Лама шайлап алгаш, биеэки быдын ол өгнүң ширтээниң кырынга салып кааш, чорупкан.
Лама чорупканда, аалдың ыды ээрген.
Кадай олура:
― Ыт чүнү ээре-дир, барып көрүңерем, уруглар!—деп-тир.
Уруглар үнүп көргеш:
―Лама дедир моорлап олур — дишкеннер.
Лама чедип келгеш:
― Кончуг-ла үнелиг чүвем кааптып-тыр мен, дилежип көрүңер, уруглар!
деп-тир. Уруглар дилежип-дилежип:
― Ширтек кырында чүве-даа чогулу, чүгле улуг быт кылаштап чор — дишкеннер.
Лама амырай берген:
― Ол-дур, ол-дур, мээңии-дир, эккелиңер!—деп-тир.
Оозун ап алгаш, таваар чоруп каап-тыр.
Өгнүң ээзи чедип келгеш:
― Аалгачүү болду, кадай?—деп айтырган.
― Элдептиг лама кижи чорду. Ол лама үнүп чоруткаш, дедир кээп, кончуг үнелиг эдим каапкан-дыр мен дээш, улуг-ла быт тып алгаш барды — дээн.
― Өгнуүң ээзи олура:
― Ол-даа анаа эвес кижи-дир, уруг-дарыымга багай болур, бурган кижи-дир — дээш, соондан чоруп-ла каан.
Сүрүп чеде бергеш, авыралдап:
― Башкы кажан, кайыын үнген ирги?—деп айтырган.
― Мен-даа аалдар кезип падарлап, аъш-чем, акша-хөреңги дилеп чоруур кижи мен — деп-тир.
― Бистиң аалывыска чүге саадавадыңар, башкы? — деп айтырган.
― Чораан мен, чораан мен, ам барбас мен — деп-тир.
― Черле барып көрүңер — деп, чаннып туруп, эдертип эккелген.
― Уруг-дарыымга буяндан кылып, хайырлап көрүңер, башкы— дээш, эзерлиг, чүгенниг аът туткан. Падарчы багай чилби лама ынчап быт-биле эзерлиг аътка чединген дижир.
