Хандагайты суурдан Чадаана хоорайже чанып орган бис. Хараган-Даг дужунга чедип кээривиске, грузовик машинаның мотору турупкан. Кара элдеп чүве. Бистер машина кырынга элдепсинип олур бис. Чолаачы бирде кабинден үнер-даа, бирде кабинче кирер-даа.
- Фонарь болза! – дигеш, чолаачы шимээн барды.
Караңгызы кедергей. Кижи кулаа көзүлбес. Хенертен Хараган-Даг бажында от кызаш диди. Аъттар даваны дизирешти. Аъттыг кижилер аразында бир-ле чүве чугаалашты, сөс-домаа билдинмес болду.
Таптыг-ла Дагыыр-Тей чанынга караңгы дээрден төгерик от кээп дүштү. Ол оттуң чырыынга ак аъттыг, көк торгу тоннуг эр кижи көзүлдү. Көзүлбес кижилер каттырышты.
- Даа кожууннуң чагырган Хайдып ноянның тускай ыраажызы Сат Бойдаа көстүп келди! – деп, чиктиг үннер дыңналды. Каас-коя хептиг эр кижи эзерлиг аъдындан дүшкеш, таалал болган ноянның чылдың дагып чорааны Дагыыр-Тейни мактап ырлай берди. Шынын сөглээрге, Хайдып ноян шагда таалал болган, ооң ынак ыраажызы Сат Бойдаа база шагда-ла мөчээн чүве болгай.
Нояннын ыраажызы ырлап-ырлап, ак аъдын мунгаш, чиде берди. Караңгы дүннү чырыдып турган от өштү. Элдеп чүве чүл дээрге, бистиң грузовик машинавыс мотору база катап дагжай берген.
Алган дөзү:
Кенин-Лопсан М.Б. Кара дээрниң тыныжы. – Дыхание черного неба. – Кызыл: Ю.Ш. Кюнзегеш аттыг Тываның ном үндүрер чери, 2010. – А. 214 - 215.