Тожулар шагдан бээр Дагылганны дагып чорааннар. Дагылганның ээзи Улуг-Даш дижир. Ол Улуг-Даш эрте шагда Моолдан көжүп келген дижир. Ол Улуг-Дашты улус эскерип кааш, дагып эгелээн.
Тожуга хувискаал чеде бээрге, Улуг-аттыг деп ирей тургаш:
- Бо Улуг-Даштың мында чедип келгеш, дагыдып чыткан херээ чүл? – дээш, хемче чиңгиттеп бадырыпкан.
Ол Улуг-даш ам чыткан черинде чок, ону сугже чуупкан ирей база чок. Ол ирейниң улгады берген ийи уруу база чок апарган. Чүгле чаңгыс оглу арткан. Өске төрелдери төнген.
Дагылган – улуг орук чаны чер. Олап дүне чоруурга, чылгы шимээни дагжап эрте бээр дижир. Аъттыг чораан кижиниң соонга бир-ле чүве ушкажыптар дижир.
Алган дөзү:
Кенин-Лопсан М.Б. Кара дээрниң тыныжы. – Дыхание черного неба. – Кызыл: Ю.Ш. Кюнзегеш аттыг Тываның ном үндүрер чери, 2010. – А. 228.