Бир-ле кижи-кийиктер тускаа өг-бүле тудуп, өглениир деп баргаш, эр кижи-кийик бир аалдың уруунга ынак болур. Ол уруг авазынга чугаалаар. Мен эр кижи-кийикке ынак болдум дээрге, чөвшээревес. Бир күн кижи-кийик ол уругну алгаш баар. Аалынга эккелгеш, ооң кыдыынан ыравас. Демги эр кижи-кийик бичии ырай бээр болса, демги өске кижи-кийиктер демги уругну туткаш чиптер деп баар. Ол чанынан ыравас күннү бадыр кады кылаштап, ажылдап чоруп турар.
Бир күн уруг бодунуң төрээн өг-бүлезинге аалдаар болган. Өөнге чедип баргаш, шайлап ынчап олурар. Демги кижи-кийик база кады турар. Бир эвес уруг ырай баар болса, демги кижи-кийик уругнуң ада-иезин тудуп чип каар. Удавас ынчаның күнүнде худа-дой эрттирер бис деп чалаар. Уруг тургаш, демги ашаа чокта чугаалаар: ‘Че, авай, ачай силер баарда, бир-бир иңген теве мунуп баар силер. Чүге дээрге, бо кижи-кийик деп чүдек чүгүрүк болур. Албан иңген теве мунуп баар силер. Кижи-кийик кижини чиксээнде, чаагын тудуп мендилежир. Чаагы чаглыг бе? деп турары ол, ону база билип алгар. Ол дээрге, силерниң чаагыгарны тудуп семизеп көрүп турары болур. Баарыгарга, ынчап мендилежир болса, меңээ чугаалаар силер. Мен чоргузуптар мен деп чугаалааш чаныптар.
Демги дугурушкан күнүнде ача-авазы арагы-дарысын алгаш чедип келир. Келгеш дүжерге, олар чаагын тудуп мендилешкен. Ада-иези уруунга чугаалаарга: ‘Че, силер ийини мен харыылаар мен. Канчап ойлаарыгарны мен билир мен’ дээр. Худа болуп, демгилер шупту худалааш эзирип калыр. Уруг ада-иезинге арагыны бичии ижер силер дээн. Кижи-кийиктер көрүп турарга, уругнуң адазы ишкен кижи бооп арагызын тонунуң чеңинче кудуп турар. Мен ава-ачам-биле бичии чугаалажыптайн дээш, чаштын үндүргеш, иңген тевезинге мундургаш, чандырыптар. Ооң артынан дем эзирик азалар ойлаткаш, четпээн дээр.
