Бо Чола-Саң деп черге бистиң аал чурттаа-ла сезен-тозан чыл чоокшулай берген. Чола-Саң деп чүге адаан дээрге, шаанда дээ ол чагыр хаяга чола (ёла) деп куш уялап турган. Сөөлгү үеде ол куш ховартаан. Ынчангаш бо черни ол куштуң ады-биле адап каан. Бо дагда ам эзир уялап турар. Аң-мең көвей, чоокта чаада ирбис база чораан. Чола деп куш улуг куш, ийи чалгынын чадып алгаш ужуп чоруурда, ийи-үш метрге чеде баар. Ак баштыг, ак төштүг, салдыг куш боор. Ужунан көөрге, узун ак салдыг ашкыяк кижи кептиг түрлүг. Бистиң бо черде ийи-чаңгыс бар. Бистиң сеңгил тывалары ол кушту ыдыктыг деп санап чоруур ужуру база бар, ону күндүлээр. Чаагайын, чаражын деп көөр, кей-аът киирген эки куш дээр.