Хурмусту, Хайрахан, Бай-Алдайым деп Хурмустуну аайтыр. Бай-Алдайны Хурмусту деп күндүлеп адаар.
Чаш оолдарны база ынча деп аайтыр чүве диик: “Хурмустунан курут ап чиир улуг чалыы бол” дээр. Ол дээрге, “Узун дурт-сынныг өзүген оол бол” деп йөрээп аайтып турары ол. Хурмусту өртемчейни чаяаан. Бурган багшы ону номнаар. Ону номнаарда, кижи өлүр, төрүүр, кыш, чай болур деп номнаан.
Кандыг-даа чиве эр, кыстыг турар; эки, бактыг турар. Ынчап бурган бакшы номнап каан. Кижи бүрүзүн бурган бакшы иезиниң бөксезинен төрүүрде, саарынга часкааш салыр. Ынча кире болгаш, ындыг чүве эдилээш, өлүр сен дээр.
Бо номнаанындан кым-даа эртпес. Ооң аразындан аза-шулмус кижи деп чүвени алыр деп былаажыр, ону хам кижи чайыс кылып каар. Мен үш чылдың иштинде чүвени билип турар мен. Кижиге төөзүн аайтпас мен. Сен өлүр деп аайтпас мен, ол кижи өлүр болса-даа, аайтпас мен. Иштимге сактып каар мен.
Дээр көвей каът болур. Харангының ораны деп бар. Өлген кижи база чурттай баар. Кымысыяк чивени чиир. Харангының орчулаңында өлүг сүнесин чурттаар. Бис чырык орчулаңда тур бис. Бистиң үстүвүсте ак дээр, хара дээр деп бар. Ак дээрде айның кижилери турар. Хара дээрде, сылдыс турар, ында хам кижиниң азалары турар. Ак дээрниң кырында ай, күн-биле катай чурттап турар кижилер база сүнесиннер бар.
