Эрте бурун шагда, бир Бедегелиг-Бора-кушкаш чоруп-тур оо. Тенниг хаактың кырынга олурар дээрге, бедегезин чара шанчып каар кире болурга, өшкүге барып-тур оо.
- Өшкү, өшкү, бо хаактың тенин чип берем – деп тур.
- Бо улуг черде көк сиген эңдерлип чыдарда, хаактың тенин чүге чиир ийик мен – деп тур.
Бедегелиг-Бора-кушкаш көөркүй Бөрге барып тур.
- Бөр, бөр, дээ өшкүнү чип берем деп тур. Дээ хаакты меңгээ чип бербейн тур.
- Мында улуг семис малдың эъди турарда, ол арган өшкүнү чиггеш канчаар мен – деп-тур.
Бедегелиг-Бора-кушкаш унуун Аңчыга барып тур.
- Аңчы, аңчы, дээ Бөрнү адып бернен,
- Сээң Бөрүңнү адар тургаяк, бодумнуң мурнунда чаагай аңнарны адып албайн тур мен Ындыг шөлээн чок – деп-тур.
Унуун Күскеге барып тур.
- Күске, күске, Аңчының тонун хыдып берем деп-тур. Меңгээ Бөр адып бербейн тур кулугур, чылыг тонун барып хыдып берем – деп-тур. Күске тургаш:
- Аңчының тонун хыдыыр чай кайда чүвел, бодум мында хөеэ тудар чап чок тур мен – деп-тур.
Унуун соңгаар хураан кадарып турар оолдарга барып тур.
- Оолдар, оолдар, Күскени өлүрүп бергерем – деп-тур.
- Ындыг хок Күске өлүрүп ойнап чоруур чап кайда бисте, ында хураанывыс кадарар бис. Ооң орнунга өрге, тарбаан адар бис – деп-тур.
Онуун кидис каап турар хоочуннарга барып-тур.
- Хоочуннар, хоочуннар, оолдарыгарны эттеп бергер – деп-тур.
- Ындыг шөлээн кайдал, кидис каап турда, хураан кадарган эрлиг оолдарывысты чүге эттээр бис – деп-тур.
Бедегелиг-Бора-кушкаш көөркүй арга ядааш, дии өрү үнүп алгаш, дыңсыг-дыңсыг сыгырып-тур. Сыгырыптарга, салгын үнүп, кидис каган хоочуннарның дүгүн ап чажыптарга, хоочуннар тургаш:
- Бора-кушкаш, Бора-кушкаш, сыгырба, оолдарывысты эттеп берээли – дээш хоочуннар оолдарны эттээр бис дээрге, оолдар Күскени өлүрер деп баарга, Күске аңчының тонун түрген-түрген хыдыыр бооп-тур. Аңчы корткаш, Бөрнү адып бээр бооп-тур. Бөр өшкүнү чип бээр бооп, өшкү корткаш хаакты чип берип-тур. Унуун соңгаар Бора-кушкаш көөркүй бедегези чарылбас, күнде кээп олурар черлиг, чаагай оруннуг бооп амыр-чаагай чыргап-тур оо.
