Эрги чылывыс үндү,
Чаа чылывыс кээп чыдыр,
Буура чылывыс өттү,
Бодаган чылывысты ап чыдыр бис.
Менди чаагай!
Чурттап чорган чуртувус,
Мактап чорган Алдын делегейивис!
Бак чүвени өткүргер,
Эки чүвени көзүлдүргер,
Бай-Хан, Алдын делегейивис!
Бодаган чылывыска-даа менди,
Кожуун чуртувуска-даа менди-чаагай!
Чурттап чорган чуртувуста,
Харлыг Хайыракан чуртум бар,
Хомду, Харааты Алдын делегейивис бар.
Санап четпес салаалыг,
Адап четпес адырлыг,
Торгум болган Алдайым!
Туман болган булудум,
Чөөк, Бай-Алдайым!
Амзаваан ак-көгүвүстүң
Дээжизин сөңнеп берип тур бис!
Көрүп чоргар, Алдын делегейивис!
Хомду бажы, Хураан-Көлүм!
Санап четпес салаалыг,
Адап четпес адырлыг,
Бай-Хан, Алдын делегейивис!
Ала хөөнен эге алган,
Ак-Хем хемивис бар,
Ак соян чуртувус-даа бар,
Агынан аккан Ак-Кем, Бай-Алдайывыс!
Харазынан аккан Харааты-Кем, Алдын делегейивис!
Ээ, Бай-Алдайым!
Эрте-дээр үеден чурттап чорган чуртувус,
Мактап чорган Бай-Алдай, Алдын делегейивис!
Чингис Ак-Кемниң белдири,
Чеди кемниң белдири,
Эрте-дээр үеден чурттап чораан,
Мактап чораан Бай Хан, Алдын делегейвис!
Кей-аъдывысты киискидип,
Кежик-буянывысты делгередип бергер!
Он үш Алдайым!
Үжен үш Хурмустум!
Бай-Алдайым, Алдын делегейим!