Ада болган үжен үш Хурмустум,
Ие болган он үш Алдайым!
Балгажынга байыткан Бай-Алдайым,
Довураанга тодурган Бай-Алдайым!
Эзер болган кертииң бар,
Эмиг болган сүүрүӊ бар,
Хорум-чаагай эдээң бар,
Хоргулжун чаагай бажың бар,
Хоор улуг адың бар,
Ээ, Бай-Алдайым!
Эзер болган кертиктиг,
Эмиг болган сүүрлүг,
Хоргулжун баштыг,
Хорум эдектиг,
Хоор улуг шолалыг, Бай-Алдайым!
Сундунуп аккан суг-кемиң бар,
Сууртунуп үнген чаш ыяжың бар,
Чарлып үнген чалым-хаяң бар,
Чайганып үнген чаш ыяжың бар.
Урук сөөрткен оорчунуң оруунан чайыс кыл,
Улуп келген кокай бөрүнүң оруунан чайыс кыл!
Холу ханныг, аксы үстүг,
Хортан дайсынның холунан чайыс кыл!
Доткар чүгүмнү дозуп тур,
Четкер чүгүмнү чизеп тур,
Үжен үш Хурмустум, он үш Алдайым!
Ие болган он үш Алдайым,
Эки багымны көдүрген,
Соксу солаан шаамда,
Сөөгүмнү көдүрер үжен үш Алдайым!
