Алдыы-Ишкинге ачамның адазы Имандай дээр кончуг игилдээр чылгычы кижи чораан. Ооң игилдээрин дыңнаар дээш кайыын-даа кижилер аян-чорук кылып чедип келгилеп тургулаан.
Игилчиниң бир онза чүвези – янзы-бүрү, омак-хөглүг, хоюг-уян аялгалар-биле кады, мал-маган болгаш өске-даа амытаннарның алгыржырын ол-ла хевээр ойнап келир кижи чораан дижир чүве.
Игилинге көшкен аалдың малын сүрүп бар чоруурун, кижилерниң мал-маган хай деп алгыра кааптарын, хой, өшкүнүң болгаш анай, хураганның алгыржырын олчаан-на дыңналдыр ойнап келир кайгамчык кижи чораан дээр болгай.
Өгге ырак черден өске улус келгенде, оларны канчаар хүндүлээрин, эът-чемни хайындырарын игил дамчыштыр кадайынга ойнап бээр кижи чораан. Кадайы ону билир болгаш, игилчи ашактың чугаалаанын күүседип, эът-чемни немей дүлүп, шайын база катап хайындыра бээр.
Имандайның игилдээринден ыглап турган чаш уруг таалап удуй бээр чораан. Оглун хоскан малды игилдеп тургаш алзыр. Оглун хоскан кыс мал ашак игилдей бээрге, карааның чажы төктүп келгеш, хоскан оглун чыттап, чылгааш, дораан-на эмзире бээр турган.
Арапчор