Актыг чарынчы кижи оор чарынчы кижини сүрүп чоруп олурган. Актыг чарынчының чарнынга оор кижи ону билгензиг, оруун будап чоруур кылдыр дүшкен. Мээң сүрүп олурарымны билип чоруур база чарын салыр кижи-дир бо, ындыг эвес мону кажарлаар-дыр деп, актыг чарынчы боданган.
Ол бөргүн, тонун, идиин дедир кедипкеш, аъдын дедир эзертээш, дедир мунупкаш, кезек дыштанып орган.
Оор чарынчының чарнынга сүрүкчү кижиниң бүгү боду, аъды-хөлү дедир баштыг дүжер болган. «Бо-даа шүүтсүнгеш, дедирленген-дир» — дээш, оор кижи таваарлап эгелээн. Ол бир черге одагланып алгаш, дүште-даа чок шайлап орда, ону сүрген кижи бо-ла келген.
Кара оор чеже-даа кажар болза, актыг-дүктүг малын алыскан кижи ынчалдыр ооң кырын орта дүжүп-тур оо.
Кыс-Халыыр
