Куу куш бурганның ыдыктыг кужу дээр. Ынчангаш куу куштуң хонар чери безин буянныг арыг чер болур. Куу шагдан бээр ховар куш. Кууну өлүрүп болбас турган.
Шаанда Тере-Хөлге чурттап чораан Соруктуг-Дарган деп кижи эштиг куунуң бирээзин боолап каан. Эжи өлген кыс куу чайны чайладыр алгырып ыглап келген. Ол алгыра бергенде, ооң үнүн дыңнаан кижилерниң куйга-бажы адыяр, дыка-ла кээргенчиг турган дээр.
Күс дүжүп, чанар куштар арлы берген. Тере-Хөлдүң кыдыынга кара чаңгыс эжин өлүрткен кыс куу агарып чыдып калган. Эр эжиниң өлген черинге ыглап алгырар. Хөл кыры дошталып, хар чаап, соок дүжүп келген. Чаңгыс кыс куу ыглап-ыглап, эдип-эдип, дээрже дүндүүштелдир ужуп үнгеш, эр эжиниң өлген черинге, доң шынаага, чылча дүшкен.
Хөл кыдыынга чурттап чораан кырганнарның чугаалажыры: эжин өлүрткен эр куу чайладыр ыглап, алгыргаш, күзүн хамык чанар куштар ужуп чанып турда, хамыктың сөөлүнче чедир арткаш, ужуп чоруй баар. Келир чылын кыс эжиниң өлген черин долгандыр ушкаш кээп хонгаш, алгырып, эдип ыглаар дижир.
Куу куштуң уязы өг хевирлиг болур. Ол өг уяның тооназынга чедир кулузун малгаш-биле кылып алган болур. Бичии оолдары ооң иштинге өзер. Шаанда Тере-Хөл кыдыынга куу куштарның уялары тургулады, көрүп чордум.
Арапчор