Шаанда кымыскаяк борбак кара, чараш-даа амытан чораан. Кончуг чараш кымыскаякты ол кадайланып алган. Кымыскаяктың кадайы ажылдавас, үнгүрүнге киргеш, ажы-төл төрээш, чыдып берген.
Бир катап эр кымыскаяк бай аал чанынга маңнап келген. Ол өгнүң чанында өл-ааржы чаткаш, кургадып каанын көрүп каан. Кымыскаяк чадып каан ааржыдан ызырып алгаш, маңнап ыңай болган. Өгнүң ээзи кадай ону көрүп кааш, шывык-биле кымыскаяктың дал ортузунче каккан. Ол үзүлгеш, чүгле оорга сөөгүнге артып калган.
Үзүлгеш, чүгле оорга сөөгүнге ызырынган кымыскаяк өөнге арай боорда калгып келген.
- Силерни азыраар дээш чүгле чааскаан ажылдаар-дыр мен. Ажы-төлдү ашкарып-чемгерип, азыраар дээш чоруп чорааш үзе шаптырып алдым – деп хыйланган.
Оон бээр кымыскаяктар шуптузу үзүк-болук болу берген. Ынчалза-даа кымыскаяктар ажылга ынак, шуптузу ажылче кады үнер апарганнар.
Арапчор