Чаңгыс-даа оглу чок, хөй кыстарлыг аңчы ашак чурттап чораан чүве-дир. Адазы оларын бир-ле кыжын, «Өгге сыйтыңайнчып каттыржып, белен эът чип олурган херээ чүл боларның» — дээш, ол хемниң иштинде бир куйга эккеп каап-тыр. Кыстар ол куйга чурттап ая-дузаан кезип, тооргу-киш өлүрүп кыштааннар. Чулук өйү кирип, маасталып кээрге, олар мургу долгап, чулук соруп, бо хемни өрү чоктааннар. Мургу-биле медээлежип, ырлажып чорааннар:
Муңгаралды чазып алыр
Мургу долгап ойнаал, угбай,
Аштаанывыс намдадып аар
Айдан, бестен казаал, угбай.
Хемниң уну шыргайларны
Кержек-биле аштап чор бис,
Херээжок дээш орар эвес
Кешти, чагны чүктеп чор бис.
Ол куйнуң ханазында арылбас ыш бар. Ону кыстар кую дээр, а ол хемни Мургулуг дээн.
Кыс-Халыыр
