Бурунгу ашактар чугаалажырын дыңнаар мен. Кезер-Чиңгистиң чээни Сартакпан деп кижи чоруп-тур. Ол кижи Хемчикти Мешкен-Хөл, Чүглүг-Хөл деп хөлдерден ээжээ-биле бугалап бадырган дижир. Хемчикти Бай-Тайга, Тээли даглары бооп бараалгаан. Ак-Довурак, Кызыл-Мажалык даглары база доскан. Yттүг-Хая даглары Хемчикти дозуп шыдавайн, Соксаалга кээп доскаш, база чадааш, ам соксаан чүве дээн.
Саваажок Сартакпан Хемчикти Шанчыглап, Ийме бели-биле ажырар деп чорда, даайы Чиңгис ужуражып кээп-тир.
Чиңгис тургаш:
― Хемчикти кайыын бадырдың, оол?— деп-тир.
― Мешкен-Хөл, Чүглүг-Хөлден үндүрдүм — дээн.
― Берге-дир бе?—деп айтырган.
― Хемчикти чедеримге, тергеден белен, теведен чүгүрүк чүве-дир — дээр орта, Хемчик хорадааш, Шом-Шумче чара шаап бады барып-тыр.
Сартакпан оон хаккаш, Хемчиктиң аксынга баарга, Хемчик Улуг-Хемче кире берген бооп тур.
Сартакпан оон хем кыдыында бир өгге кире бээрге, пашта чүве хайнып туруп-тур. Оон изиг чода ушта соп алгаш, Чиңгистиң соондан каккаш, Соксаалга тура дүшкен, аңаа ооң аъдының изи чыдып калган. Тээлиге кээп тепкен — ооң чаңгыс аъдының изи арткан. Базаракка кээп бастырган — ийи аъдының изи бар. Сартакпан Чиңгис даайын Шапшаал кырынга чеде халды бээрге, демги чодазы изиг хевээр болган. Оозун даайынга тутсурга, Кезер-Чиңгис тургаш:
― Сен-даа орта эвес кижи-дир сен, сени Саваажок Сартакпан деп адаар-дыр, оол — деп-тир.
Кыс-Халыыр
