Бурган башкы хоран кылып олургаш, оозун шыгжавайн, дашкаар үне берген. Бурган башкының өөнге ооң шавылары артып калганнар.
Ол аразында чылан чылбыртып чедип келгеш, шавыларны бурган башкы деп бодааш, хомудал кылып:
- Кандыг-даа чүве бистерни, чыланнарны таварышкан-на черинге чылча базар, эът чиир амытаннарга белен чемиш болган, кандыг-даа камгаланыр чүвевис чок, кончуувусту, биске камгаланыр чүведен хайырлап, кээргеп көрүңер – деп дилээн.
Шавылар көөрге, чыланның даван-даяа-даа чок, чүгле соястап чоруур, кээргенчиг амытан бооп-тур.
Шавылар камгаланыр чүвези чок чыланны кээргээш, башкызының кылып олурганы хораны-биле чыланның бажындан кудуруунга чедир чаапкаш, салып чорудупкан.
Бурган башкы даштыгаа чорааш көөрге, ооң өдээнден бир-ле чүве буруладыр ышталып, от-көзү кызаңайнып бар чораан.
Бурган башкы шавыларындан:
- Өгден бир-ле чүве буруладыр ышталып, от-көзү кызаңайнып бар чоруур кандаай чүвел? – деп айтырган.
Шавылар тургаш:
- Маңаа чылан келгеш, даван-даяа-даа чок, соястап чоруур, кандыг-даа чүве оларны таварышкан-на черинге чылча базып чоруур, эът чиир амытаннарга белен чемиш болган, камгаланыр чүвези чок кээргенчиг амытаннар болдувус, камгаланыр чүведен хайырлап берип көрүңер дээн. Хоран-биле чаапкаш салыптывыс.
Бурган башкы олургаш:
- Ол канчаарыңар ол, чыланыңарны дүрген-не тып эккелиңер. Ооң эрткен черинден бүгү чүве хып кывар, өртемчей өрттенир дээн-дир, дүрген-не ону эккелиңер! – деп дужааган.
Шавылар демги чыланны илбектеп эккелгеннер.
Бурган башкы ол чыланның бажындан кудуруунга чедир кежин сывыра тырткаш салып чорудупкан. Ынчалза-даа чыланның аас-дылынга хоран артып калган. Оон бээр чыланнарның камгаланыр чүвези – ооң хораны болу берген.
Арапчор