Бурган башкы бүгү-ле дириг амытаннарны чаяап турар үеде аразында сөзүн билчип чугаалажыр чүвелерге чүгле кижи биле ытты чаяаган.
Кижилерниң өске амытаннарга бодаарга эң-не чоок эжи, каяа-даа үргүлчү кады чоруур болгаш сеткил-хөңнүн чугаалажыр эжинге ытты чаяап берген. Ынчалза-даа ыттың чугаакыр деп чүвези кижиден артык, бичии-ле дыңнаан, көрген чүвезин шуптузун чугаалап бээр мындыг болу берген. Кижиге-даа ыт амыр-дыш бербестээн. Ооң-биле кады кым чүнү канчапканын билген дораан-на ээзинге кээп сөглээр. Ооң соонда кижилерниң аразынга алгыш-кырыш үнер апарган. Кижи боду база ыдының хоп дажып кээринге ырмазы сынган.
Кижи шыдап чадааш, Бурганынга келгеш, чүвениң алыс ужурун чугаалаан.
- Бо ыттың чугаакыр деп чүвезинден кижилер амыр-дыш көрбестеди. Ыт кижилер аразынга хоп дажыглааш, чогуш-кырыш үндүрүп, амыр-дыш бербестеди, ам ытты канчалза эки ирги? – деп чугаалап берген.
Бурган башкы кижиниң чугаазын дыңнааш боданып олургаш, кижини ыт кагбас ужурлуг, ол айыылдан камгалап, келген айыылды баш удур билип, сагындырып чорзун дээш, ытты эмин эрттир чугаакыр, хопчу болганындан ону кижигилештир чугаалавас, чүгле ээрип чоруур кылдыр чаяаган.
Арапчор