Хостуг хүрешке делегей чемпиону, Россияның он бир дакпыр, Европаның ийи дакпыр чемпиону, аныяк-чалыы спортчу кыс, «Тыва Республиканың алдарлыг спортчузу» деп хүндүлүг аттыг. Ол 1985 чылдың август 10-да Өвүр кожууннуң Хандагайты суурга төрүттүнген.
Хеймерек болгаш, өг-бүлениң эрге-чассыг уруу бооп өскен. Чажындан-на спортту сонуургай берген. Хостуг хүреш, кыс кижи... А чогум кандыг-даа чаяан ук-дөстүг болгай. Лариса ындыг уктуг, ооң хүрешти сонуургай бергенинде кижи кайгаар чүве чок бооп-тур. Тываның бир алдарлыг малчыны, ооң кырган-ачазы Чирик Ооржак Саглыда шыырак дээн мөге чораан, даайлары база-ла «алдан дөрттүң чириин дуглап», шүглүп чораан чүве-дир. Бирги класс өөреникчизи Лариса спорт залынга келгеш, оолдарның хүрежирин үргүлчү көөр апарган. Тренерлер: «Мында чүгле оолдар чүве-дир, сен бар че» - деп чугаалап турза-даа, уруг хүннүң чыгыы кээр бооп-тур. Бир катап Виктор Монгушевич Достай Ларисаны хүрештирип көргеш, пат-ла кайгап калган. Ол оолдар-биле деңге тутчур, күш-даа, кашпагай-даа талазы-биле олардан чыда калбас бооп-тур. Ёзулуг-ла дайынчы мөзүлүг төл, сес харлыг ийиги классчы шак ынчаар спортче базымны кылган.
Чаңгыс борбак мөге кыс тренериниң ачызында мергежили бедип, бодунуң деңзизинге оолдар-биле деңге хүрежип, тиилеп келген. Тываның барык бүгү кожууннарын эргээн. Барыын-Хемчикке бир малчын Ларисаның хүрежин магадап көргеш, шары белекке берген чүве-дир. Оолдар кежегелиг мөге-биле адааннажып хүрежир, ынчалзажок октадып алгаш, ыядыр-даа апарган. Мөгелер даңзызында ооң адын көрүп кааш, бир оол хүрешпейн барган таварылга турган.
«Чүгле Тывазынга эвес, Россияга база хүрешсин» деп тренериниң шиитпирлээр үези келген. Лариса мырыңай Россия чемпиону болу берген. Ол дээрге 1999 чыл, Осинники деп хоорайга маргылдаа-дыр. Оон бээр Лариса 11 дакпыр Россия чемпиону. Чурттуң шилиндек командазынга киргеш, 2000 чылда Братиславага, дараазында чылда Измирге ол Европа чемпионну болган. А 2003 чылда ол шышпыкче үнген: делегей чемпиону!
Бичежек дурт-сынныг көңгүс чалыы кыс бодунуң харыысалгазын эки билир, тура-соруу бедик. Сагыш-човаачал, дузааргак Лариса хостуг үелеринде ажыл чок олурбас. Ол Тываның күрүне университединиң күш-кулътура факультедин дооскан.
Лариса Ооржак амгы үеде. Олимпиада-2004-те 48 кил. деңзиге 5-ки черни ээлээн, 3 дакпыр Европа чемпиону, 2 дакпыр делегей чемпиону, Россия Федерациязының алдарлыг спорт мастери.
Алган дөзү:
1. «Тываның алдарлыг мөгелери» (Знаменитые борцы Тывы) / С. Ы. Ооржак - Кызыл: Тываның ном үндүрер чери, 2005.
2. XX чүс чылда Тываның алдарлыг кижилери - Кызыл: Тываның ном үндүрер чери, 2004.
3. Спортчу календарь / http://sport-calendar.ru/lichnosti-v-sporte/item/oorzhak-larisa
(көрген хүнү: 15.10.2018 ч.)