Ооржак Маңнай Намзыраевич 1892 чылда Сүт-Хөл кожууннуң Манчүрек деп черге төрүттүнген. Бичии Маңнай 4 харлыг турда, ада-иези чок болганнар. Ол 12 харлыындан тура, Бижээчи-Чалаң деп бай кижиге хөлечиктеп, ооң малын кадарып чораан.
Маңнай Ооржак бүгү назынында Дзун-Хемчик кожууннуң Теве-Хая суурга мал кадарып ажылдаан.
18 харлыындан эгелээш, Маңнай Ооржак ачазының талазындан кырган-ачазы Дагырык Ооржактан тоолдаарын өөренип, 20 харлыында-ла сураглыг тоолчу апарган. Ооң кырган-ачазы бодунун салым-чаяанын авазы Тоолдаар-кадай деп тоолчудан өөренип ап, бодунуң билиин уйнуунга дамчытканы ол. А Маңнай бодунун талазындан ол салым-чаяанын чаңгыс чер-чуртуунга Хүргүл-оол Ооржакка дамчыдып, ону тоолдаарынга өөреткен.
Тоолчунуң тоолдарын бир-ле дугаар бижидип эгелээн кижи – ооң чаңгыс чер-чуртуу, башкы О.-Д. Херлиг-оол. Дараазында бодунуң репертуарында бар тоолдарны тоолчу боду бижээш (ол тускай бижикке өөренмээн), аас чогаал шинчилекчилеринге дамчыдып берип чораан.
Ол 1968 чылда Алдан-Маадыр суурга мөчээн.
Алган дөзү:
- Боктуг-Кириш, Бора-Шээлей // Тувинские героические сказания / сост. С.М. Орус-оол. – Новосибирск: Наука, 1997. – С. 539-540.