28.08.1921
Төөгү эртемнериниң кандидады, Тыва АССР-ниң культуразының алдарлыг ажылдакчызы.
Ленинград хоорайга төрүттүнген. 1938 чылда школа дооскан соонда Ленинградтың күрүне университединиң Чөөн-чүк факультединиң этнографтыг салбырынче кирген. Ооң өөредилгезин дайын ара үскен. 1941 чылдан Л.В. Гребнев – фронтуда. Генерал Панфиловтуң командылалының адаанда 8-ки гвардейжи адыгжы дивизиязының иштинге Москваның камгалакчыларының одуруунда, Калинчи болгаш 2-ги Прибалтийжи фронтуларынга тулчуп тургаш, Алдар орденниң үшкү чадазы-биле шаңнаткан. 1944 чылда Л.В. Гребнев аар балыглаткан. Эмнеткен соонда ол университетке өөредилгезин уламчылап, 1946 чылда этнограф-түрколог деп мергежилге өөренип дооскан. Ол-ла чылын ол аспирантураже киргеш, 1949 чылда ону дооскан. 1950 чылда ССРЭ-ниң Дээди өөредилге яамызы Л.В. Гребневти Тываже чорудупкан. 1950 чылдан 1975 чылга чедир ол ТДЛТЭШИ-ниң төөгү болгаш этнография секторунуң эргелекчизи, эртем секретари болуп ажылдап турган. 1956 чылда Л.В. Гребнев «Тыва маадырлыг тоолдарның чогаалдары (төөгү-этнографтыг шинчилел шенелдези)» деп темага кандидаттың диссертациязын камгалаан.
Л. В. Гребнев ийи томнуг «Тываның төөгүзү» (М., 1964) болгаш «СЭКП-ниң тыва организациязының төөгүзүнүң очерктери» (Кызыл, 1975) деп ажылдарның тургузуунче улуг салыышкынны киирген, оларның үндүрүлгези республиканың эртемчи чуртталгазынга чугула болуушкуннар болган.
Л. В. Гребнев Тываның төөгүзүнге хамаарышкан хөй-хөй эртем ажылдарының чогаадыкчызы, оларның иштинде монографиялар: Тыва арат-көшкүн чоннуң сууржуң амыдыралче шилчилгези. – Кызыл, 1955; Тыва маадырлыг тоол. – М., 1960; Маадырлар дугайында чугаа. – Кызыл, 1960; Тыва маадырлыг тоолду школага өөредири. – Кызыл, 1966; Тываның ажылчын аңгызы. – Кызыл, 1971 (В.Ч. Очур-биле каттай чогааткан).
1975 чылда ол Украин ССР-ниң Луганск хоорайже көшкеш ында тус черниң башкылал институдунуң төөгү кафедразының башкызы болуп пенсияже үнеринге чедир ажылдап турган.
Тыва АССР-ниң Дээди Чөвүлелиниң Президиумунуң Хүндүлүг бижии-биле болгаш «Шылгараңгай ажыл дээш» деп медаль-биле шаңнаткан.
Амгы үеде Украинаның найысылалы Киев хоорайда чурттап турар.
Алган дөзү:
1. Ученые ТИГИ / сост. М. П. Татаринцева. – Кызыл, 2005. – Ар. 38.