10.04.1934 – 12.06. 2000
Тыва Республиканың чогаалчылар эвилелиниң кежигүнү, Тыва Республиканың культуразының алдарлыг ажылдакчызы.
Амгы Сүт-Хөл кожууннуң Алдан-Маадыр сумузунуң девискээринге төрүттүнген. Тыва Автономнуг Областының нам школазының чанында комсомол кадрларын белеткээр курстарын, Кызылдың башкы өөредилге черин болгаш 1966 чылда Кызылдың күрүне башкы институдун дооскан. 1954 чылда Алдан-Маадыр школазының кижизидикчи башкызы болуп ажылдап эгелээн. 1955-1956 чылдарда Өвүр кожууннуң райком ВЛКСМ-ниң ийиги секретары турган. Ооң соонда 1966 чылдың 7 айынга чедир Саглы, Алдан-Маадыр болгаш Суг-Аксы школаларынга башкы болуп ажылдап чораан.
1966 чылда ТДЛТЭШИ-ниң чогаал болгаш аас чогаал секторунуң биче ажылдакчызы кылдыр ажылдап кирген, 1973 чылда улуг эртем ажылдакчызының дужаалынче шилчиткен. 1990 чылга чедир ТДЛТЭШИ-ге ажылдап турган үезиниң дургузунда тыва улустуң аас чогаалын чыырынга, каш-даа удаа экспедицияларны удуртуурунга, республиканың тоолчуларының болгаш ыраажыларының чыыжын белеткээринге идекпейлиг киржип, канчаар-даа аажок улуг ажылды чоруткан.
Тыва аас чогаал чыындыларының тургузукчу-чогаадыкчызы болуп турган: Тыва тоолдар. – Кызыл, 1968; Демир-Шилги аъттыг Тевене-Мөге. – Кызыл, 1972; Арзылаң-Мерген. – Кызыл, 1974; Баазаңайның тоолдары. – Кызыл, 1980; Маңнайның тоолдары. – Кызыл, 1971; Бора-Шокар аъттыг Боралдай. – Кызыл, 1983; Тыва улустуң тывызыктары. – Кызыл, 1976. «Ниитилел-политиктиг терминнериниң тайылбырлыг сөстүүн» тургузарынга киришкен.
Алган дөзү:
1. Ученые ТИГИ / сост. М. П. Татаринцева. – Кызыл, 2005. – Ар. 39-40.