10.09.1972
Дыл эртемнериниң доктору
Кызыл хоорайга төрүттүнген.
1996 чылда Кызылдың күрүне университединиң дыл эртеминиң салбырын дооскан. Башкы өөредииниң сайзыралының институдунуң национал культура болгаш бийлег (танцы) өрээлиниң методизи, школага хөй-ниитиниң башкызы болуп ажылдап турган. 1998-2001 чылдарда ТГШИ-ниң бижимел саңының эргелекчизи болуп турган. 2000 чылдан эгелээш чөөн-чүк шинчилелдериниң секторунче; 2003 чылдан – аас чогаал секторунуң биче эртем ажылдакчызы кылдыр шилчиткен. 2001-2004 чылдарда РЭА-ның Сибирь салбырының дыл эртемнериниң институдунуң арыннажып өөренир аспирантуразынга өөренип турган. 2004 чылдың 12 айдан эгелээш РЭА-ның Сибирь салбырының дыл эртемнериниң институдунуң аас чогаал секторунуң биче эртем ажылдакчызы, 2006 чылдан – эртем ажылдакчызы, 2018 чылдан башкарыкчы эртем ажылдакчызы.
2006 чылда «Тываларның ёзулалдарының шүлүк чогаалдары: тургузуу, семантиказы» деп темага РЭА-ның Сибирь салбырының Моол болгаш төвүт шинчилелдер институдунга кандидаттың диссертациязын камгалаан. 2018 чылда РЭА-ның А.М. Горький аттыг Делегей чогаалының институдунга «XXI чүс-чылда Кыдаттың тываларының аас чогаалы болгаш ёзулалы: тургузуу, семантиказы, арга-дугуржулгазы» деп темага докторнуң диссертациязын камгалаан.
Ж.М. Юша –Россияның гуманитарлыг саңының, Россияның дөзектиг шинчилелдер саңының, РЭА-ның Дөзектиг шинчилелдер уг-айтымнарының (программазының) удуртукчузу болгаш киржикчизи. Ында амгы аас чогаал шинчилелдериниң болгаш этнографияның эң чугула айтырыгларын шинчилеп кылып турар. Сибирьниң болгаш Ыраккы Чөөн-чүктүң девискээрлеринге база Кыдат, Моол, Турция дээн ышкаш даштыкы чурттарга эртип турган 40 ажыг аас чогаал, этнография экспедицияларының удуртукчузу болгаш киржикчизи болуп турган.
«Сибирьниң болгаш Ыраккы Чөөн-чүктүң чоннарының аас чогаалының тураскаалдары» деп ийи дылдыг академиктиг дизигде Ж.М. Юша дараазында томнарның харысаалгалыг тургузукчузу болур: «Тываларның ырыларының сарыыны (лирика)», «Тываларның ёзу-чаңчылдыг аас чогаалы», «Тожу тываларының аас чогаалы», «Тофаларның аас чогаалы», «Тофа улустуң ырылары».
Алган дөзү:
1. Ученые ТИГИ / сост. М. П. Татаринцева. – Кызыл, 2005. – Ар. 156.