сентября 2018

Саваан дүгүң көвең болсун, 
Саваажың бажы салбыраң болсун! 

 Овааның улуу силерде болсун! 
 Олчаның улуу бисте болсун!  

 Овааның улуу силерде болсун!
 Олчаның улуу биске болсун!
 Силер улуг оваа болгар, 
 Бис көжүп-дүжүп, күрүн-чурт болаакай! 
    

 Бээр көрген бедиим, 
 Хая көрген хадырым, 
 Калбааңга тайыспа, 
 Доңгулааңга бүдүртпе, 
 Бай-Алдайым! 
 Хорум кептиг, 
 Хоргулжун баштыг,
 Ак-Кем, Бай-Алдайым! 
 Өршээп, хайрлагар, 
 Аарыг-аржыктан адыргар!      
     
  Аарыг-човулаңнан адыр, 
  Алдын-сарыг аршааным! 
  Силерни дилеп, манап келдим.
  Мындыг аарыглыг болдум.
  Аарыымны адырыгар, 
  Човулаңымны чаптылдырыгар!   
  Алдын-сарыг аршааным!
  Үш чыл улай силерге кээп четтирер мен, 

Чээ, бээр көрүп бегире тын,
Беш-Богда, Бай-Алдайым!  
Хая көрүп ханырап тын,
Улуг Хайрхан Бай-Алдайым!   
Калбак эдээмни чадып,
Кара бажымны мөгейтип,
Силерге чалбарып тейлеп олур мен, Бай-Алдайым!
Адыл-малымны четкил-менди болдур!
Ачы-үренимни дагшыыр-дымаадан шөлээн болдур!
Аалывыс менди болсун,
Малывыс онча болсун!
Довураанга тодурган,
Балгажынга байыткан Бай-Алдайым!

Өөрүң түмен болсун!
Беш кожуун малдың баштыңы бол! 

Малывыстың сүлдези өршээсин!
Куштуң чалгынындан чиик болсун, 
Октан чүгүрүк болсун,
Дүрген экириир болсун,
Курай, курай!        

Чииктээн малывыс көвей болсун!
Чииктээн санында чүс-чүс, муң-муң болсун! 
Ажы-төлүмнүң чажы узун болсун! 
Ак салдыг, ак баштыг болсун! 

Оъктан чүгүрүк бол! 
Көвеңнен чиик болсун, 
Акталаан малыгар түмен четсин! 

Кыргыыр малың түмен болсун,
Хачың чидиг болсун. 
Холуң дыңзып турсун! 
     

Айның, күннүң экизинде, 
Адыл-малды чииктеп чыдыр бис.
Азырагар, авырагар! 
Малывысты түмен чедиригер,
Ажы-төлүвүстү түмен чедиригер! 
Экиниң бараанын көзүлдүрүңер, 
Баък чүве көзүлдүрбегер! 
Түмен болсун малывыс! 
Өршээгер, азырагар, авырагар! 
     
Чииктээн малыңар чиик болсун! 
Чииктекчиниң холу ак болсун!
Чииктээн малы түмен болсун! 

Чажы узун болсун, 
Чаяаны бады болсун, 
Чыргалы улуг болсун, 
Эди кээрек болсун, 
Ээзи мөнге болзун! 

Эди чөөк болсун!  
Ээзи мөңге болсун! 
 
Узун чаштыг,
Удаан чыргалдыг, 
Буурул баштыг, 
Буржак диштиг, 
Артыы эдээңни, 
Адыл-мал салгап артсын! 
Мурнуу эдээңни, 
Ачы-үре салгап артсын!  

Эдер хектиң эдери
Ээр ыяшка домулду.
Эки хамның айыткалы
Эьт-чүрээмде домулду.

Чажыл хектиң эдери
Чаш ыяшка домулду,
Чаӊгыс агамның айыткалы
Чаш чүрээмге домулду.

Бора хектиң эдери
Бо ыяшка домулду,
Бодум хамның айыткалы
Бо-ла чүрээмде домулду.

Чээреннен кежээкей,
Чеди хонук келээкей.
Онаагындан кежээкей,
Он-на хонуп келээкей.