сентября 2018

 Ээ, мээң төрээн чаагай чуртум, 
 Бээр көрген бедик дагларым, 
 Хая көрген хадыр дагларым, 
 Удур көрген улуг дагларым! 
 Сууртунуп өскен узун ыяштарым, 
 Сундунуп аккан узун сугларым!
 Дээр хаан Хурмустум, 
 Бээр көрген Бай-Алдайым! 
 Адыл-малга каража-човаг чок болсун!
 Ам дораан үнүп келир сарыг-күнүм,
 Кезээ мөңгеде чайнап турсун! 
 Төрениң сүлдези өршээсин! 
 Хомду, Харааты төрээн чуртумнуң…
 Мактап ханмас бай хонажым, 
 Ажы-төлүмге, адыл-малымга, 
 Ак оруун хайрлап чорсун! 

Үжен үш Курмустум, 
Он үш Алдайым, 
Эмиг болган шораңныг, 
Эзер болган кертиктиг, 
Сүт болган шөлдүг, 
Сүме болган даглыг, 
Ажы-төл, адыл-мал менди-чаагай, 
Чыл, кыштан менди үндүвүс. 
Буура чылывыс үнүп, 
Бодаган чыл кирип чыдыр. 
Ажы-төл, адыл-мал, 
Аал, кожуун-чурт менди-чаагай чорсун! 

Ада болган үжен үш Хурмустум,
Ие болган он үш Алдайым!
Балгажынга байыткан Бай-Алдайым,
Довураанга тодурган Бай-Алдайым!
Эзер болган кертииң бар,
Эмиг болган сүүрүӊ бар,
Хорум-чаагай эдээң бар,
Хоргулжун чаагай бажың бар,
Хоор улуг адың бар,
Ээ, Бай-Алдайым! 
Эзер болган кертиктиг,
Эмиг болган сүүрлүг,
Хоргулжун баштыг,
Хорум эдектиг,
Хоор улуг шолалыг, Бай-Алдайым!
Сундунуп аккан суг-кемиң бар,
Сууртунуп үнген чаш ыяжың бар,
Чарлып үнген чалым-хаяң бар,

Эрги чылывыс үндү,
Чаа чылывыс кээп чыдыр,
Буура чылывыс өттү,
Бодаган чылывысты ап чыдыр бис.
Менди чаагай!
Чурттап чорган чуртувус,
Мактап чорган Алдын делегейивис!
Бак чүвени өткүргер,
Эки чүвени көзүлдүргер, 
Бай-Хан, Алдын делегейивис!
Бодаган чылывыска-даа менди,
Кожуун чуртувуска-даа менди-чаагай!
Чурттап чорган чуртувуста,
Харлыг Хайыракан чуртум бар,
Хомду, Харааты Алдын делегейивис бар.
Санап четпес салаалыг,
Адап четпес адырлыг,
Торгум болган Алдайым!

 Удур көрген улуг даам,
 Хая көрген хадыр даам,
 Бээр көрген бедик даам! 
 Эмиг болган сүүрлерлиг,
 Эзер болган кертиктерлиг,
 Сууртунуп үнген чаш ыяштарлыг,
 Сундунуп үнген кем-сугларлыг,
 Ээ, өршээ, Хайыракан!
 Калбаанга тайыспа,
 Доңгулаанга бүдүртпе!
 Балгажынан байыдып,
 Довураанан тодурган, 
 Бай-Алдайым, өршээ!
 Ээ, түмен чылдызым,
 Алдын күнүм, мөңгүн айым!
 Өршээ, Бай-Алдайым! 

  Чурттап чоруур чуртум,
  Мактап хонган бай хонажым, 
  Артымдан сөлеп өршээ, 
  Мурнумдан дозуп өршээ! 
  Сөөк Хайрхан, Бай-Алдай!     
   
  Көъш чаагай болсун! 
  Чайлаг чаагай болсун!      
 
  Мактап хонган бай хонажым, 
  Ажы-төл, ачы-буян, 
  Аас-кежиин хайрлагар,
  Эки кадыкшылды хайрлагар!    
  Бай-Алдайым!         

Эзер болган кертиивис,
Эмиг болган сүүрүвүс,
Бай-Хан, Алдын делегейивис!
Санап четпес салаалыг,
Бай-Хан, Алдын делегейивис!
Тас баштыг тарчыгарнан,
Буурул баштыг бургугарнан,
Эдирең мыйыстыг тегернен,
Кулча мыйыстыг кошкарыгарнан,
Хонук дүштүүгерни хайрлагар,
Дергигерни хайрлагар, Бай-Хан Алдын делекей! 

 Улуг Бай-Алдайым! 
 Улуг далайны кештивис.
 Улуг өөрдүвүс,
 Улуг далайны артадывыс, 
 Хайрхан Бай-Алдай! 
 Ак оруугарны хайрладыгар, 
 Амы-тыным хайрладыгар! 
 Ээ, Бай-Алдайым!  
       
 Улуг ак оруугарны хайрлагар, 
 Улуг далай, мөрүн-кемим! 

Эки сөзүңнү бээр кыл, 
Багай сөзүңнү ыңай кыл! 
Үш чүс чаш чажа, 
Үш чүс ак чумургалыг бол! 
Бодуң кап-кара болса-даа, 
Орууң ап-ак бол!         

Үш чүс чаш чажа,
Үш ак чумургалыг бол! 
Багай чивени ыңай ал, 
Эки чивени биске айт! 

Тая аскырның саарындан, 
Тарлаг буганың мойнаандан болсун! 

Хардан ак, 
Сөөктен кадыг кидис болсун!