Оол:
Хара бууралыг тевени
Кадарар дээниң канчалды?
Хара көлдүң эриинге
Харгыжар дээниң канчалды?
Канчалды, канчалды, канчалды?
Кыс:
Хара бууралыг тевем
Хатка дүшкеш саададым,
Харааты хемниң иштинге
Соок болгаш барбадым.
Барбадым, барбадым, барбадым.
Чеңгии паштың хайынбазын,
Чеңгем онуун ажынарын.
Честек-каттың бышпазын,
Честем оолдуң ажынарын.
Чарык аксында чаңгыс ыяш
Чеже аалга от болурул,
Чаңгыс чеңгий шайым ай
Чеже кижиге суксун болурул.
Кертик аксында кезек ыяш
Чеже аалга от болурул,
Кезик чеңгии шайым ай
Чеже кижиге суксун болурул.
Орук аксында ол ыяш
Чеже аалга от болурул,
Ортту чеңгии шайым ай
Чеже кижиге суксун болурул.
Хорум дашты козураткан
Хоор бениң кунну аай,
Кожуун чуртту көлзеткен
Хойыт сөөктүг оолак мен.
Хая-дашты козураткан
Хара бениң кунну аай,
Хары чуртту каткырткан
Хара салдыг оол мен.
Эрик черни эмире баскан
Эремек бениң кунну аай,
Эр-ле меңээ эрге берген
Эң кенче кулугур аай.
Хорум дашты козураткан
Хоор-ла бениң кулуну,
Хамык амытан хөктеткен
Кандыг чүвениң үренил?
Хая-дашты казыраткан
Хара бениң кулуну,
Хамык амытан хөлзеткен
Кандыг кижиниң үренил?
Өлген бораан чаарда-ла,
Өреге чогу кежээ иргин.
Өске чуртка чоруурда-ла,
Өскүс-чавызы кежээ иргин.
Харлыг бораан чаарда-ла,
Каттанчы чогу кежээ иргин.
Харының чуртунга чоруурда-ла,
Хара чаңгыс оол кежээ иргин.
Ээви найратыныӊ суун
Элезин довурактан богбас.
Эргелиг тѳрениӊ чарлыын
Эп мегенен алдавас.
Хомду Хараатыныӊ
суун Хог довурактан богбас.
Кожуун тѳрениӊ чарлыын
Хоп мегенен алдавас.
Ак хемниӊ суун
Адыш довурактан богбас.
Ачылыг тѳрениӊ чарлыын
Арга чамнан алдавас.
Худуг сугнуӊ бажынан
Узуп ижип чоруй бардым.
Кууш моюннуг кыдат сен,
Хунугжуп кайгап калдыӊ.
Кара сугнуӊ бажынан
Узуп ижип чоруй бардым.
Кара сагыштыг кыдат сен,
Кара ѳѳӊ кайгап калдыӊ.
Булук сугнуӊ бажынан
Узуп ижип чоруй бардым.
Буруу сагыштыг кыдат сен,
Бурлуп кайгап калдыӊ.
Аршаан сугнуӊ бажынан
Амзап ижип чоруй бардым.
Ала сагыштыг кыдат сен,
Аксыӊ тудуп калырыӊ ол.
Аргар эъди амдан болду,
Аал чуртум сагыш болду.
Чээрен эъди чем болду,
Чер чуртум сагыш болду.
Кошкар эъди хонук болду,
Кожуун чуртум сагышсырады.
Койгун эъди чем болду,
Кожа чуртум сагышсырады.
Өлген бораан чаарда,
Өреге чогу багай-дыр.
Өске чуртка чоруурда,
Өскүс чаңгыс багай-дыр.
Чаашкын-бораан чаарда,
Чаргак чок багай-дыр.
Чаг чуртка чоруурда,
Чаңгыс бот багай-дыр.